Laugardaginn 22. febrúar fóru fram fyrstu vetrarleikar Sörla í Sjóvámótaröðinni. Þrátt fyrir vætu fyrr um morguninn, þá var veðrið hliðhollt mótinu og stytti upp um leið og pollarnir opnuðu keppnina klukkan 11:00. Frá þeirri stundu hélt veðrið sig í skefjum og skartaði sínu fegursta allt þar til síðustu keppendur luku keppni undir lok dags. Völlurinn var töluvert blautur en knapar létu það ekki á sig fá enda mættu 118 keppendur til leiks á þessum vetrarleikum.
Á vellinum ríkti einstök stemning þar sem knapar á öllum aldri, frá pollum til fullorðinna, sýndu frábæra reiðmennsku og sönnuðu hversu öflugt reiðfólk er í okkar röðum. Keppnin var bæði spennandi og skemmtileg, og mikil gleði skein af öllum þátttakendum. Hvort sem um var að ræða keppendur, forráðamenn barna, sjálfboðaliðar eða starfsfólk, þá lögðu allir sitt af mörkum til að tryggja að mótið gengi vel fyrir sig.
Hápunktar dagsins
Pollaflokkurinn opnaði leikana með bros á vör og glæsilegum hestum. Í þessum flokki er engin sætisröðun, þar sem þátttakan og gleðin skipta mestu máli.
Í barna- og unglingaflokkum var spennandi keppni og margar glæsilegar sýningar. Úlfar Logi Gunnarsson og Dís frá Sveinsstöðum sigruðu í minna vönum barnaflokki, en í meira vönum bar Hjördís Antonía Andradóttir sigur úr býtum á Stefni frá Garðabæ. Í unglingaflokki minna vönum sigruðu Freyja Lind Saliba og Víðir frá Norður-Nýjabæ, en í meira vönum unglingaflokki unnu Ásthildur V. Sigurvinsdóttir og Hrafn frá Eylandi.
100 metra skeiðið var afar spennandi, þar sem Ylfa Guðrún Svafarsdóttir og Straumur frá Hríshóli voru hraðast með tímann 8,1 sekúndu og bættu sig um hálfa sekúndu frá síðasta vori.
Í ungmennaflokki og byrjendaflokki fullorðinna var hart barist um efstu sætin. Hulda Þorkelsdóttir sigraði í minna vönum ungmennaflokki og Fanndís Helgadóttir í meira vönum ungmennaflokki. Í byrjendaflokki fullorðinna stóð Þórunn Þórarinsdóttir uppi sem sigurvegari á Gýju frá Litla-Garði.
Karlaflokkar og kvennaflokkar voru ekki síður spennandi. Ásbjörn Helgi Árnason og Fjalar frá Litla-Garði sigruðu í Karlaflokki 2, á meðan Ásta Snorradóttir og Jörfi frá Hemlu II unnu Konuflokk 2. Í sterkum kvenna- og karlaflokki 1 tryggðu Þorgerður Gyða Ásmundsdóttir og Nína frá Áslandi sér sigur í kvennaflokki, en Bjarni Sigurðsson og Karlsefni frá Hvoli sigruðu í karlaflokki.
Heldra fólk og Opinn flokkur lokuðu mótinu með glæsilegum sýningum. Smári Adolfsson og Fókus frá Hafnarfirði unnu Heldra fólksflokkinn, en í Opna flokknum bar Kristín M. Ingólfsdóttir sigur úr býtum með Ásvar frá Hamrahóli.
Við óskum öllum keppendum til hamingju með frábærar sýningar og þökkum öllum sem komu að mótinu fyrir sitt framlag. Það er ljóst að veturinn byrjar með krafti í Sjóvámótaröðinni og við hlökkum til næstu keppni!
🎉 Til hamingju keppendur – við sjáumst í næstu vetrarleikum Sörla í Sjóvámótaröðinni!🎉
Nánari úrslit má finna hér fyrir neðan sem og stig sem knapar hafa unnið sér inn eftir þetta mót.
